About Me

My photo
PhD Candidate at Purdue University, Computer Science.

Tuesday, August 03, 2010

يا ايها الشعب الانتوخ

video


زمان .. وأنا لسه حنين
وموتور دماغى بيلين
صدقت إني مش بشتغلني
وإن الطريق مفتوح وهين

تلاتين سنة طالع نازل
على كل سلم بتنازل
عن حاجة حلوة ف كياني
لحد ما بنوا لي العازل

تلاتين سنة من عمري الحي
عمر الأماني وعمر الضي
راحوا ف عمايا
والجوع ورايا
خبوا الضحايا "البُبـُع" جاي

على بطني رابط حزاماتي
مداينني حتى الجزماتي
بعت الكنب الاسطمبولي
وعايشها فـُلي حلمبولي
أنا وعيالي ومراتي

تلاتين سنة بامشي على السلك
والوحش ساكن بيتي الملك
وحش ابن هرمة
دماغه صرمة
حاطط ايديه ف بودرة تلك

أحش غيطي وأزغط فيه
تخن قوي ومبقتش أكفيه
ده غير بقى جيش ألاضيشه
وبجيبله بيرته وحشيشه
وبت جارتى بتدفيه

عررضني لمواقف وحشة
وكمان قليط ابن الجحشي
ومن ضرايبي بيتشيك
وأنا من قرايبه بتحيـّك
حوحو كده ومن غير فرشة

بيَّعني أرضي ومفهومي
قلعني فكري وهدومي
مخي اتقفل فيلم على كليب
ولما يفتح يشرب كدب
ما أنا أصلي أهبل من يومي

مسحوا لي من بـُقي الأه
ظبطوني بين شخطة وزقة
والوحش زقلط بقى باشا
يفطر بدمي على بغاشة
وادعي له يعلى ويترقى

ما أنا البعيد اللي أستاهل
آخد خازوق كده ع الماهل
تلاتين سنة غارز بارز
مالوش منازع ومبارز
والشعب طيب على جاهل

وحياة حلاوة زنازينكم
والفقريار اللي حازنكم
أنا مش غبي وجبان وحمار
وأستاهل الوحش الجبار
يهينـّي ويطلع دينكم؟

ما تزعلوش قوي كده فيه إيه؟
ما قال بلاوي ما ردوا عليه
نحل وبركم
وكل عبوركم
وجاب خبركم عملتوا ايه؟

أنا وانتوا والعُصبة السودة
حطاه بارومة و فسودة
لو كان فيه خير كان هل وبان
شرم برم حالي تعبان
عقدة بشنيطة ومعقودة

يا أخ يا جميل يا مثقف
حتى انت برضه بتتأفأف
أفلا ترى الوحش ف دارنا
يا عم ركز واحضرنا
نعش احتضارنا بيتأيف

صناعة حتى الولاعة
بنجيبها م الصين يا جماعة
وتجارة أولها خسارة
وزراعة بارت وإدارو
ذمتها واسعة ومتباعة

وسجون وقمع ومعتقلات
وعيش مفيش لو تقدر هات
وطابور عواطليه وعزاب
عايشين ف غربه وف استغراب
ومقضينها كافتيريات

ملايين بقى فضائية ونت
تشت ولا حاجة بتـنبت
ساكتين فشر دول شعب اللك
عاملين بشر قابلين العك
راجل وست وشب وبت

كلنا كده ف الهم سواء
من غير لماضة ولا استعلاء
عملنا م البحر طحينة
سبناه بيلعب ف الطينة
حدفنا بالفصحى بخراء



يا أيها الشعب المنفوخ..
يا أبو النفوخ الدربندوخ..
مش آن بقى تفوّق سِـنـّه..
لا ف الأثر ولا ف السُـنـّة..
تعيش غبى وتموت مفشوخ

مضمض عيونك بتاريخك
واقرى اللى كاتبينه شيوخك
ماتخافش م الوحش ده خيخة
كبير كبيرهم بطيخة
ليه تسيبه يلهط بطروخك

كفايه دولة هس وشيى
حماركو مش عاوز يمشى
وبكره يحرُن ويرفـّس
وتيجى تركب تتفعّص
حمار بقى وما بيفهمشي

وانت اللى ربيته ف خوفك
لو طال هياكلك من جوفك
سيبه بقى واركب مراجيح
بفلوسك اللي ف بنك الريح
وده يبقى آخر معروفك

مش لازم الجيل التالي..
أرجوك بقى تسيبوا عيالي..
يمكن يحبوا النيل والأرض..
وفوق ترابها يصلوا الفرض..

1 comment:

Mahmoud said...

ايه ياعم الحاجات اللي توجع دي بس